Ég þekki það af eigin raun að eiga erfitt með að tileinka mér stærðfræði. Mér gekk illa að tileinka mér menntaskólastærðfræðina á sínum árum og það var ekki fyrr en ég var komin yfir þrítugt að ég varð svo heppin að fá góða kennara sem voru þolinmóðir og með tíð og tíma þá fór mér að ganga betur og betur og á stuttum tíma þá var ég orðin með þeim hæstu í bekknum og kennararnir hvöttu mig áfram og innleiddu hjá mér keppnisskapið sem varð til þess að ég útskrifaðist hæst í einkunn í stærðfræði af útskriftarhópnum vorið 2013 .

Eftir frumgreinadeildina lá leiðin í hugbúnaðarverkfræði og á sama tíma hóf ég að kenna heilu bekkjunum í frumgreinadeildinni stærðfræði, bæði í aukatímum og í svokölluðum prófbúðum sem undirbúningur fyrir lokapróf. Samhliða tók ég að mér nemendur í einkakennslu og kenndi ég með þessu móti næstu 4 ár.

Menntun mín kemur að gagni í kennslunni, en ég er með BSc í tölvunarfræði frá Háskólanum í Reykjavík og með MSc í verkefnastjórnun frá Háskóla Íslands, svo ég þekki raungreinar mjög vel. Ég hef því yfir áratugsreynslu af stærðfræðikennslu á grunn- og menntaskóalstigi og hef reynslu af því að kenna ungmennum (og fullorðnum) með sérþarfir líkt og ADHD, einhverfu og sértæka málþroskaröskun. Nálgun mín að kenna nemendum á netinu með TEAMS hefur góða raun og tel ég að þessi raunheimafjarlægð sé af hinu góða því þá getur nemandinn verið í sínu eigin umhverfi og verið með kennarann í tölvunni og getur verið með slökkt á myndavélinni ef nemandinn vill. Það þýðir að ég get kennt nemendum hvar svo sem þeir eru í heiminum.